Twas Pidgin Style

Was da night bafo' Christmas, and all ova' da place
Not even da geckos was showin' their face.

Da stockings was hangin' on top da TV?
... ... ('Cause no mo' fireplace in Hawai'i)

Da kids stay all crashed, my old man too.
They leave all da work for you-know-who.

So me, I stay pickin' up alla their toys,
When - boom! - outside get only big noise!

I run to da window, I open 'em up,
I stick out my head and I yell, "Eh! Wassup?!"

An den, I no can ba-lieve what I seen!
Was so unreal, you know what I mean?

This fat haole guy get his reindeers in my yard!
An reindeers not housebroken, you know, as' why hard!

But nemmind, dis Christmas, so I cut 'em some slack.
Plus, had uku pile-ah presents pokin' outta his sack!

So I wait 'till he pau tie up his reindeer,
Then I yell out da window, "Huui! Brah, ova hea!"

An' I tell 'em first thing, when I open da door,
"Eh, Hemo your shoes! You going dirty my floor!"

He take off his boots, he tell, "You know who I am?"
I go, "Ho! From the smell, must be Mr. Toe Jam!"

He make mempachi eyes and he go, "Ho, ho, ho!"
By now, I stay tinking dis guy kinda slow!

He look like my Tutu, but little less weight,
And his beard stay so white, mo' white dan shark bait!

He stay all in red, specially his nose,
An get reindeer spit on top his nice clothes!

But him, he no care; he just smile at me,
And he start fo' put presents unda-neath da tree.

I tell 'em, "Eh, brah, no need make li'dat,
And watch where you step! You going ma-ke da cat!"

Den, out from his bag, he pull one bran new computah,
Choke video games, and one motorized scootah!

He try for fill up da Christmas socks too,
But had so much pukas, all da stuff went fall troo.

When he pau, I tell 'em, "Eh Santa, try wait!
I get plenty lef ‘ovahs, I go make you one plate!"

But he nevah like hang, he had so much fo' do;
Gotta make all Dem small kids' wishes come true.

So I wave 'em goodbye, an I flash 'em da shaka,
And I tell 'em, "Mele Kalikimaka!"

When he hear Dat, he stop an I telling you true,
He go, "Garans ball-barans! Merry Christmas to you!